Formimi i qeverisë në Kosovë, ambasadori suedez: Sfidë në shumë vende evropiane

Ambasadori i Suedisë në Kosovë, Jonas Westerlund, ka komentuar situatën aktuale politike në vend, duke theksuar se formimi i qeverisë është një sfidë e zakonshme për shumë vende evropiane dhe jo vetëm për Kosovën.

“Sa i përket formimit të qeverisë, kjo është një sfidë që e kemi të gjithë. Ka shumë vende në Evropë, në Evropën Perëndimore, që u duhet disa muaj për të formuar një qeveri. Kjo është pjesë e lojës. Nuk kam komente shtesë për këtë. Uroj që të gjitha partitë politike të jenë fleksibile dhe në fund do të formohet një qeveri, si gjithmonë”, tha Westerlund.

Duke u ndalur edhe tek perspektiva evropiane e Kosovës, ai theksoi rëndësinë e integrimit në Bashkimin Evropian si një hap kyç për zhvillim të qëndrueshëm ekonomik dhe stabilitet afatgjatë.

“Ndryshe nga Suedia, ju keni një vendndodhje shumë të mirë gjeopolitike në Evropë. Mendoj se Ballkani Perëndimor ka një të ardhme të ndritur. Mendoj që sa më shpejt të jetë e mundur duhet të bëheni anëtarë të BE-së. Pasi të bëheni anëtarë të BE-së, do të keni një të ardhme të madhe, një të ardhme në drejtim të zhvillimit ekonomik. Thjesht duhet të bëni disa kompromise për t’u bërë anëtarë të BE-së dhe pastaj mendoj që ju pret një e ardhme shumë premtuese”, u shpreh ambasadori.