Reuters: Edi Rama drejt mandatit të katërt historik
Kryeministri i Shqipërisë, Edi Rama, është në rrugë për të siguruar një mandat të katërt të paprecedentë si udhëheqës i vendit, pasi rezultatet e para nga zgjedhjet parlamentare të së dielës tregojnë një epërsi të theksuar të Partisë Socialiste.
Sipas të dhënave të Komisionit Qendror të Zgjedhjeve, me rreth 30% të votave të numëruara, Partia Socialiste ka fituar 53% të votave, shumë përpara Partisë Demokratike të udhëhequr nga ish-kryeministri Sali Berisha, e cila ka arritur vetëm 34%, transmeton Reuters.
Rama, në pushtet që nga viti 2013, konsiderohet favorit për të fituar edhe një mandat të ri, i ndihmuar nga ndikimi i krijuar gjatë 12 viteve qeverisje, një periudhë e fundit e zhvillimit ekonomik dhe një profil ndërkombëtar i konsoliduar.
Nëse ky rezultat konfirmohet, ai do të ketë katër vjet të tjera për të ndjekur objektivin e tij për ta anëtarësuar Shqipërinë në Bashkimin Evropian deri më 2030 – një premtim që e bëri thelb të fushatës së tij, edhe pse disa ekspertë e shohin si tepër ambicioz.
Një mandat i katërt do të përforconte gjithashtu pozitat e Ramës pas një periudhe të tretë të shënuar nga tensione politike me opozitën, përfshirë përplasjet me Berishën dhe një sërë skandalesh që kanë përfshirë akuzat për korrupsion.
Për herë të parë, rreth 200,000 shqiptarë që jetojnë jashtë vendit patën mundësi të votojnë në këto zgjedhje. Rezultatet përfundimtare pritet të publikohen të hënën ose të martën.
