Takimi me liderët e partive, Osmani: Ky është veç fillimi, shpresoj që secili do të angazhohet për interesin e vendit
Presidentja Vjosa Osmani ka deklaruar se do të vazhdojë takimet me liderët e partive politike edhe pas datës 15 maj, për të zhbllokuar situatën politike dhe për të siguruar stabilitetin institucional.
Ajo ka theksuar se është e domosdoshme që të gjithë të vendosin interesin shtetëror mbi çdo gjë tjetër, pasi moskonstituimi i Kuvendit rrezikon funksionimin e institucioneve kushtetuese të Kosovës.
“Ky është vetëm fillimi i një serie takimesh. Ne do të vazhdojmë diskutimet, varësisht nga zhvillimet e ditëve në vijim. Kjo mund të ndodhë në formatin e takimeve të deritanishme, apo në formate të tjera, përfshirë takime një nga një me liderët e partive”, ka thënë Osmani.
Ajo ka shtuar se është në zbatim të rolit të saj kushtetues dhe ka bërë thirrje që secili lider të angazhohet për të mirën e vendit.
“Shpresoj që secili do të angazhohet duke vënë si parësor interesin e vendit”, ka përfunduar presidentja.
