Bajrami: Manovrat e Kurtit dhe VV dështuan edhe një herë, pasi iu dolën në publik pazaret me Listën Serbe

Deputetja e LDK-së, Hykmete Bajrami, ka thënë se akuzat e VV’së për bllokim të Kuvendit filluan të bëhen pasi iu dolën bisedat ku Elbert Krasniqi fliste me “A.K” për krijimin e institucioneve e ku u përmenden “4 vota të Listës Srpska”.
“Manovrat e Albin Kurtit dhe Vetëvendosjes dështuan edhe një herë, pasi iu dolën në publik pazaret me Listën Serbe. Kur dolën mesazhet dhe të gjithë e kuptuan se Albin Kurtin po e votojnë edhe disa deputetë të Listës Serbe, në skenë dolën shërbëtorët e tij për të akuzuar të tjerët, kinse për bllokim të Kuvendit. Kjo propagandë nuk kalon”, ka shkruar Bajrami.
“Në çfarë situate na kanë sjellë: Ata që për katër vite e kanë shkelë Kushtetutën mbi 10 herë, sot po na e kërkojnë edhe neve ta bëjmë një gjë të tillë. Përgjigjja jonë është JO. E se kush është i paaftë, u pa qartë sot: me gjithë pazaret dhe përpjekjet, LVV arriti vetëm 52 vota”.
“Jepni dorëheqje , dorëzoni ato te Komisioni për Verifikim dhe ne votojmë raportin, duke i hapur kështu rrugë betimit të deputetëve. Deri tani nuk ka dorëheqje zyrtare. Referenca për “deklarime” të 23 dhe 27 marsit nuk është dorëheqje, sepse mbi të gjitha kur jep dorëheqje s’mundesh me u kthy në zyre të Qeverisë e me ushtru funksion prapë. Mbi të gjitha Kuvendi nuk merr vendime mbi deklarata, vendimet në Kuvend merren në bazë të dokumenteve”, ka shkruar ajo.