Ish-luftëtarit i UÇK-së: Ma kanë çel edhe varrin, plumbi i snajperit më ka dalë prej njërës anë në tjetrën
Ish-luftëtari i UÇK’së, Bujar Haradinaj ka rrëfyer për 7 plagët e marra gjatë kohës së luftës, ku tregon se edhe varri i është hapur pasi nuk dihej se a do të shpëtonte apo jo nga plagët.
Haradinaj tha se fatmirësisht ai sot është gjallë, por se e ka përjetuar rëndë edhe vdekjen e tre shokëve të tij, të cilët thotë se ishin luftëtar të fortë në luftë.
“Jom plagu rëndë unë, dhe më kanë dek 3 djem që i kam pasë më të mirët në luftë. Kom pas dikun 7 plagë prej granathedhësit, një e kam pas në qafë në arterien kryesore. Në atë kohë mu patën hapë edhe varri, se u kon ofensivë. Dy shokët kanë vdek njëri në vend, njëri në spital dhe tjetri më vonë. Të tre janë varrosur. Ramushi ka thonë qelni katër varre, se nuk dihet a po pshton edhe Bujari. Varri ka qenë i hapur, dhe fatmirësisht sot jam gjallë e këtu”, tha ai.
Tutje, ai tregon se si plumbi i snajperistit ia shpoi atij nofullin dhe i doli nga ana tjetër, dhe nuk i dëmtoi asgjë. Këtë ai e quajti fat në fatkeqësi.
“Edhe mjekët kur e kanë shiku kanë thanë se duhet me shkru në libër të Genisit, pasi plumbi i snajperës më ka hyrë këtu, në nofull e qiellz të gojës më ka dalë në anën tjetër, dhe nuk ka dëmtuar asgjë. Fat në fatkeqësi që thojnë”, tha ai.
