Me kërkesë të Gjermanisë, Lituania pritet t’i dërgojë rreth 40 trupa në Kosovë
Lituani planifikon të dërgojë rreth 40 trupa në misionin e NATO-s në Kosovë pas një kërkese nga Gjermania.
Një projekt-rezolutë mbi pjesëmarrjen e Lituanisë në operacionet ndërkombëtare bën thirrje për rritjen e numrit total të trupave të lejuara për t’u dërguar në Kosovë, në 60.
“Diskutimet në nivel të institucioneve të mbrojtjes të të dy vendeve kanë përcaktuar se opsioni më i mundshëm për pjesëmarrje të përbashkët në operacionet ndërkombëtare është caktimi i trupave lituaneze në një njësi ushtarake gjermane që merr pjesë në operacionin ndërkombëtar të udhëhequr nga NATO në Kosovë”, thuhet në shënimin shpjegues, raportoi mediumi lituanez “LRT”, shkruan koha.net.
Kontingjenti ushtarak i Gjermanisë në mision aktualisht përbëhet nga rreth 300 trupa, raporton Periskopi.
Misioni i NATO-s në Kosovë, KFOR, ka rreth 4,300 trupa, me Italinë që kontribuon me më shumë se 800 trupa dhe Shtetet e Bashkuara të Amerikës me rreth 600.
Këshilli Shtetëror i Mbrojtjes i Lituanisë miratoi në janar propozimin për të rritur numrin maksimal të trupave që do të vendosen në operacionin e udhëhequr nga NATO.
