Osmani takohet me homologun kroat: Kroacia aleate e çmuar e Kosovës në mbrojtje dhe siguri rajonale
Presidentja e Kosovës, Vjosa Osmani, ka zhvilluar sot një takim me homologun e saj kroat, Zoran Milanović, në Sofje, ku theksoi rëndësinë e marrëdhënieve të ngushta mes Kosovës dhe Kroacisë. Ajo e cilësoi Kroacinë si një aleat të çmuar të Kosovës në fushën e mbrojtjes dhe sigurisë rajonale.
Në këtë takim, Presidentja Osmani i përcolli urimet më të përzemërta Milanović për rizgjedhjen e tij në postin e Presidentit të Kroacisë.
Gjatë bisedës, ajo nënvizoi rëndësinë e forcimit të bashkëpunimit mes dy shteteve dhe theksoi angazhimin e Kosovës për avancimin e marrëdhënieve të mëtejshme me Kroacinë, si dhe në kuadër të integrimit të Kosovës në institucionet ndërkombëtare.
“Kroacia mbetet aleate e çmuar e Kosovës në fushën e mbrojtjes dhe sigurisë rajonale. Prandaj, sot në Sofje takova mikun dhe mbështetësin e fuqishëm të Kosovës, Presidentin e Kroacisë, Zoran Milanović, të cilit i përcolla urimet më të përzemërta për rizgjedhjen në këtë post.
Me Kroacinë bashkëpunojmë në mbrojtje, në ekonomi dhe në çdo fushë tjetër, sepse raporti ynë është i bazuar në besim reciprok. Me miq si Kroacia, Kosova është çdo ditë e më e fortë.”, thuhet në njoftim.
