Përndiqte një 26-vjeçare, shqiptari në Dubrovnik përfundon në pranga pas tentim vrasjes
Një shtetas shqiptar, 37 vjeçar, është arrestuar në Dubrovnik nga autoritetet kroate, nën dyshimin për tentim vrasje dhe sjellje të pahijshme.
Sipas raportimeve nga “Index.hr”, hetimet kanë zbuluar se i dyshuari, që nga korriku i vitit të kaluar deri në maj të këtij viti, kishte përndjekur një 26-vjeçare nga Bosnja dhe Hercegovina, e cila banon përkohësisht në Kroaci. Ai i ishte paraqitur asaj vazhdimisht në vendin e punës, me synimin për të krijuar një marrëdhënie romantike, pavarësisht refuzimit të vajzës.
Por situata eskaloi natën e 13 majit në Dubrovnik, kur shqiptari sulmoi një 26-vjeçar tjetër, mik të vajzës, gjithashtu shtetas i Bosnjës.
“Ai fillimisht e grushtoi në kokë e më pas, duke kërcënuar se do ta vriste, u përpoq ta therte në qafë. I dyshuari u ndalua nga një punonjës i restorantit”, thuhet në raportim.
Gjatë përpjekjeve për ta ndalur, dy persona të tjerë u lënduan nga sulmi i të dyshuarit.
I arrestuari është vendosur në paraburgim ndërsa hetimet për rastin vazhdojnë.
