ShBA-ja nënshkruan marrëveshje 142 miliardë dollarëshe me Arabinë Saudite
Një nga marrëveshjet më të rëndësishme të shpallura të martën gjatë takimit mes presidentit amerikan, Donald Trump, dhe Princit të Kurorës së Arabisë Saudite, Mohammed bin Salman, është “marrëveshja më e madhe e shitjes së mjeteve të mbrojtjes në histori”, ka njoftuar Shtëpia e Bardhë.
Sipas këtij njoftimi, marrëveshja kap vlerën prej rreth 142 miliardë dollarësh dhe përfshin furnizimin e Arabisë Saudite me “mjete luftarake dhe shërbime moderne nga dhjetëra firma të mbrojtjes amerikane.”
Në të njëjtën kohë, Shtëpia e Bardhë ka bërë të ditur se Arabia Saudite do të investojë 600 miliardë dollarë në Shtetet e Bashkuara, duke e cilësuar këtë angazhim si pjesë e një partneriteti të ri strategjik ndërmjet dy vendeve.
Presidenti Trump pritet të mbajë një fjalim më vonë gjatë ditës në Forumin e Investimeve që po mbahet në Riad, ku pritet të zbardhen edhe më shumë detaje mbi marrëveshjen dhe bashkëpunimin ekonomik dypalësh.
