SHBA-ja planifikon të tërheqë rreth 600 trupa nga Siria
SHBA planifikon të tërheqë 600 trupa nga Siria, forcat në terren reduktohen ndjeshëm.
Shtetet e Bashkuara do të tërheqin rreth 600 trupa nga Siria, duke lënë më pak se 1,000 ushtarë në terren për të bashkëpunuar me aleatët kurdë në luftën kundër grupit ekstremist të Shtetit Islamik. Lajmi është konfirmuar nga një zyrtar amerikan, i cili foli në kushte anonimiteti, pasi detajet nuk janë shpallur ende publikisht, raporton Associated Press.
Trupat amerikane kanë luajtur një rol kyç jo vetëm në operacionet kundër militantëve të IS-it, por edhe si një forcë ndarëse mes forcave kurde dhe ushtrisë turke. Turqia e konsideron YPG-në – forca kryesore kurde në Siri – të lidhur me organizatat terroriste, dhe prania amerikane ka shërbyer si një faktor frenues në përshkallëzimin e përplasjes.
Kujtojmë se gjatë mandatit të tij të parë, ish-presidenti Donald Trump u përpoq të tërhiqte plotësisht forcat amerikane nga Siria, por u përball me kundërshtime të forta nga Pentagoni. Kjo lëvizje u konsiderua si braktisje e aleatëve dhe çoi në dorëheqjen e sekretarit të atëhershëm të Mbrojtjes, Jim Mattis.
Me këtë tërheqje të re, prania ushtarake amerikane në Siri do të kthehet në nivelet e mëparshme, të ngjashme me vitet kur SHBA-ja dhe koalicioni ndërkombëtar zhvilluan fushatën kundër Shtetit Islamik. Deri tani, SHBA kishte rreth 900 trupa në vend, me qëllim jo vetëm parandalimin e rikthimit të IS-it, por edhe për të kufizuar ndikimin e Iranit dhe ndalimin e trafikut të armëve nga milicitë e mbështetura nga Teherani në rajonin jugor të Sirisë.
